གཅུང་ལ་སྤྲིངས་པའི་འཕྲིན་ལས་བཏུས།
ང་ཚོའི་ཡབ་མེས་དམ་པ་ངག་དབང་མཐུ་སྟོབས་དབང་ཕྱུག་སྟེ་ས་སྐྱ་ཁྲི་འཛིན༤༠པ་ཁོང་ནི། ཕྱི་ལོ༡༩༠༠ལོར་ཡབ་འཛམ་གླིང་ཆེ་རྒུ་དབང་སྡུད་དང་ཡུམ་ཐུ་མི་སམ་བྷོ་ཊའི་རིགས་རྒྱུད་སྒེར་ཐོན་པའི་སྲས་མོ་ཆོས་ཉིད་དབང་མོ་གཉིས་ཀྱི་སྲས་སུ་ས་སྐྱ་ཕུན་ཚོགས་ཕོ་བྲང་དུ། ཡུམ་ལ་ན་ཟུག་ཅང་མེད་པ། བཀྲ་ཤིས་པའི་ལྟས་དུ་མ་དང་བཅས་ཏེ་སྐུ་འཁྲུངས། ཡབ་ཀྱིས་ངག་དབང་མཐུ་སྟོབས་དབང་ཕྱུག་དྲག་ཤུགས་ཡོན་ཏན་རྒྱ་མཚོ་བཀྲ་ཤིས་གྲགས་པའི་རྒྱལ་མཚན་དཔལ་བཟང་པོའི་མཚན་གསོལ།
ཁོང་གཞུང་སྡེ་སྣོད་གསུམ་དང་རྒྱུད་སྡེ་བཞི་ལ་མཁྱེན་པའི་གཏེར་རྒྱ་གྲོལ། མདོ་སྔགས་གང་ལ་ཡང་ཆགས་ཐོགས་མི་མངའ་བ། ཁྱད་པར་དུ་སོ་བྱང་སྔགས་ཀྱི་སྡོམ་པ་ཚུལ་བཞིན་དུ་སྲུང་བས་ལྷག་ལྟུང་གི་ཉེས་བྱས་ཕྲ་མོའང་མ་གོས་པའི་རྣམ་པར་ཐར་པ་འདི་ཁོ་ན་ཡང་ཀུན་གྱི་དད་པའི་གསོས་སུ་གྱུར། སྣང་གྲགས་རིག་སོགས་འཁོར་འདས་ཀྱི་ཆོས་ཡོད་དོ་ཅོག་ལྷ་སྔགས་ཆོས་སྐུའི་ངོ་བོར་རྟོགས། སྐྱེ་འགྲོ་ཀུན་ལ་ཕན་བདེ་མཐའ་ཡས་པར་བསྒྲུབས་ཤིང་། ལུང་རྟོགས་ཀྱི་བསྟན་པ་གོང་ནས་གོང་དུ་སྤེལ་བའི་སྐྱེས་བུ་ཆེན་པོར་གྱུར།
སངས་རྒྱས་གཉིས་པ་གུ་རུ་རིན་པོ་ཆེའི་གཏེར་ཆོས་དུ་མ་ལས། དམ་པ་འདི་ཉིད་ཀྱི་གོང་མ་ནི་རིག་འཛིན་ཆེན་པོ་བརྒྱད་ཀྱི་ཡ་གྱལ་རྡོ་རྗེ་འཇིགས་བྱེད་ཀྱི་ཆོས་བདག་ཨ་ཙ་རྱ་འཇམ་དཔལ་བཤེས་གཉེན། པཎ་ཆེན་བི་མ་ལ་མི་ཏྲ། ཆོས་རྒྱལ་ཁྲི་སྲོང་ལྡེ་བཙན། གུ་རུ་ཆོས་དབང་སོགས་སྔ་ཕྱི་སྐྱེས་རབས་བཅུ་གཉིས་སོང་། བཅུ་གསུམ་པ་ནི་འཇམ་དབྱངས་མཁྱེན་བརྩེ་དབང་པོ༼༡༨༢༠--༡༨༩༢༽་ཡིན་ལ།
ཡང་རྡོ་རྗེ་དྲིལ་བུ་པ། ནགས་ཀྱི་རིན་ཆེན། པཎྜི་ཏ་སྒོ་མཐའ་ཡས་པའི་བློ་གྲོས། འབྲོམ་སྟོན་པ་རྒྱལ་བའི་འབྱུང་གནས། རྗེ་བཙུན་གྲགས་པ་རྒྱལ་མཚན། དྭགས་པོ་ལྷ་རྗེ་ཟླ་འོད་གཞོན་ནུ། ཀློང་ཆེན་རབ་འབྱམས་པ། གྲུབ་ཆེན་ཐང་སྟོང་རྒྱལ་པོ། རྒྱལ་བ་དགེ་འདུན་གྲུབ་པ། ལྷ་བཙུན་ནམ་མཁའ་འཇིགས་མེད། ངོར་ཁྲི་པ་ཐར་རྩེ་མཁན་པོ་ནམ་མཁའ་འཆི་མེད་བཅས་ཀྱི་སྐྱེ་བའང་བཞེས། མཐའ་མ་བཀའ་བབས་བདུན་ལྡན་འཇམ་དབྱངས་མཁྱེན་བརྩེ་དབང་པོ་ཡིན།
འཇམ་དབྱངས་མཁྱེན་བརྩེ་དབང་པོ་དགོངས་པ་གཞན་དོན་དུ་གཤེགས་པའི་ཚེ། སྤྲུལ་གཞི་གནས་མཆོག་རི་བོ་རྩེ་ལྔར་བཞུགས་པའི་པཎ་ཆེན་བི་མ་ལ་མི་ཏྲའི་ཐུགས་ཀར་ཐིམ། སླར་ཡང་སྤྲུལ་པའི་རོལ་བ་ལྔ་སྤྲུལ་ཏེ་འགྲོ་དོན་མཛད། ངག་དབང་མཐུ་སྟོབས་དབང་ཕྱུག་ནི་སྐུ་གསུང་ཐུགས་ཡོན་ཏན་འཕྲིན་ལས་ཀྱི་སྤྲུལ་པ་ལྔ་ཡོད་པ་ལས་གསུང་གི་སྤྲུལ་པ་ཡིན་པར་གཏེར་ཆོས་ཀྱི་ལུང་བསྟན་ཤིན་ཏུ་གསལ་པོ་ཡོད་པར་མ་ཟད། འཇམ་མགོན་ཀོང་སྤྲུལ་བློ་གྲོས་མཐའ་ཡས༼༡༨༡༣--༡༨༩༩༽དང་རྡོ་གྲུབ་ཆེན་བསྟན་པའི་ཉི་མ༼༡༨༦༥--༡༩༢༦༽སོགས་སྐྱེས་ཆེན་དག་གིས་ངོས་བཟུང་གཅིག་གྱུར་བྱུང་། དགུང་ལོ༦པར་ཡི་གེའི་འབྲི་ཀློག་ལེགས་པར་ཚེགས་མེད་དུ་མཁྱེན། འབག་མོའི་ཁ་ལོ་ཡང་བསྒྱུར་ཐུབ། ཡོངས་འཛིན་དཔོན་སློབ་གྲགས་པ་རྣམ་རྒྱལ་བསྟེན་ཏེ་ཆོ་ག་ཕྱག་ལེན། གར་འཆམ། འབུད་དཀྲོལ་རྡུང་གསུམ། དཀྱིལ་འཁོར་གྱི་ཐིག་རྩ་སོགས་ཐུགས་སུ་ཆུབ་པར་མཛད།
སྔ་ཕྱི་རིམ་པར་ཡབ་འཛམ་གླིང་ཆེ་རྒུ་དབང་སྡུད་དང་ཁྲི་འཛིན༣༩པ་དྲག་ཤུགས་འཕྲིན་ལས་རིན་ཆེན། ཁང་གསར་མཁན་ཆེན་གཞན་ཕན་སྙིང་པོ། སྐྱབས་མགོན་འཇམ་དབྱངས་ཐུབ་བསྟན་བཟང་པོ། ངོར་ཀླུ་ལྡིང་རྒྱལ་སྲས་ཆོས་ཀྱི་ཉི་མ་སོགས་མཚན་ཉིད་དང་ལྡན་པའི་བླ་མ་དགེ་བའི་བཤེས་གཉེན་གྱི་དྲུང་དུ། དཔལ་ལྡན་ས་སྐྱ་པ་གཙོ་བོར་གྱུར་པའི་བོད་ལ་གྲགས་པའི་གསང་སྔགས་གསར་རྙིང་གི་ཆོས་ཚུལ་རྒྱ་མཚོ་ལྟ་བུར་བུམ་པ་གང་བྱོའི་ཚུལ་གྱིས་མནོས། གྲུབ་མཐའ་དང་ཆོས་བརྒྱུད་ཀྱི་ཁ་འཛིན་དང་འཐེན་འཁྱེར་ཅི་ཡང་མེད་པ། ཐོས་བསམ་སྒོམ་གསུམ་ཡ་མ་བྲལ་བར་གང་གསན་པའི་ཆོས་ཐམས་ཅད་ཚུལ་བཞིན་དུ་ཉམས་སུ་ལེན། འབྱུང་པོ་འདུལ་བྱེད། ཀྱེ་རྡོ་རྗེ། ཕུར་པ། རྡོ་རྗེ་གུར།
མགོན་པོ་ཞལ་བཞི་པ་སོགས་ཡི་དམ་ལྷག་པའི་ལྷ་ཡི་བསྙེན་སྒྲུབ་སྦྱིན་སྲེག་ཁ་སྐོང་དང་བཅས་པར་ཚད་དུ་འཕེར་བར་གྲུབ། ཟབ་མོ་བསྐྱེད་རྫོགས་ཀྱི་ཉམས་ལེན་ཉིན་མཚན་ཁོར་མོ་ཡུག་ཏུ་བསྐྱངས་ཏེ་ཚེ་འདའ་བར་བྱས།
ཕྱི་ལོ༡༩༣༧ལོའི་འཕྲོས་སྦྱོར་དགེ་བའི་ཉིན་ཞིག་ལ་དཔལ་ལྡན་ས་སྐྱ་རུ་ཆོས་ཀྱི་ཁྲི་འཕང་མཐོན་པོར་ཞབས་སོར་བཀོད་དེ་ཁྲི་འཛིན་མངའ་གསོལ་བྱས། དགོངས་པ་མ་རྫོགས་ཀྱི་བར་དུ་ས་སྐྱ་པའི་ཆོས་སྲིད་ལུགས་གཉིས་ཀྱི་ཐུགས་འགན་ཆེན་པོ་བདག་གིར་བཞེས། ཐོག་མར་བླ་མ་དགེ་བའི་བཤེས་གཉེན་དུ་མའི་ཞལ་སྔ་ནས་དབང་ལུང་ཁྲིད་མན་ངག་དང་བཅས་པ་རྒྱ་མཚོ་ལྟ་བུ་གསན་བསམ་མཐར་ཕྱིན་པར་མཛད། བར་དུ་གང་གསན་བསམ་མཛད་པ་ཐམས་ཅད་ཐུགས་ཉམས་སུ་བཞེས། སླད་མར་སྣོད་དུ་གྱུར་པ་སྐལ་བཟང་རྗེས་འཇུག་གདུལ་བྱའི་ཚོགས་ལ་སྨིན་གྲོལ་གྱི་བདུད་རྩི་སྐུ་ངལ་ལ་ཡེ་ནས་མ་འཛེམས་པར་ཕངས་མེད་དུ་བསྩལ། ཐར་པ་དང་ཐམས་ཅད་མཁྱེན་པའི་ལམ་ལ་བཀོད་དེ་ཀུན་གྱི་ཡིད་ཚིམས་པར་གྱུར།
རྗེ་འདི་ཉིད་ཕྱི་ཚུལ་མཁས་བཙུན་བཟང་བ་། ནང་དུ་ཟབ་མོ་རྡོ་རྗེ་རྣལ་འབྱོར་ཁོ་ན་ལ་བརྟེན་ནས་རྟོགས་པའི་གོ་འཕང་མཐོན་པོར་སོན། ལན་ཞིག་ཡུལ་ཨ་མདོ་ནས་ཕེབས་པའི་དྷི་ཕུ་ཆོས་རྗེ་སྤྲུལ་སྐུ་ལ་རྡོ་རྗེ་རྣལ་འབྱོར་མའི་བྱིན་རླབས་གནང་བའི་ཚེ། བླ་མའི་བྱིན་རླབས་ཀྱི་སྟོབས་ཀྱིས་སྤྲུལ་སྐུའི་རྒྱུད་ལ་རང་བྱུང་རིག་སྟོང་གི་ཡེ་ཤེས་མངོན་དུ་གྱུར། དལ་གྱིས་བཞུགས་གདན་ནས་འཕར། བར་སྣང་དུ་བཞུགས། བཞུགས་གདན་དྲག་ཏུ་གཡོ་བར་བྱུང་། དེ་ནས་བཟུང་བླ་མ་དམ་པ་ངག་དབང་མཐུ་སྟོབས་དབང་ཕྱུག་གི་མཐུ་སྟོབས་ནུས་པའི་གྲགས་པ་དཀར་པོ་ཕྱོགས་ཀུན་ཏུ་གདལ།
ཡང་དམ་པ་འདི་ཉིད་ཀྱིས་རྟ་ནག་མཁན་ཆེན་ངག་གི་དབང་ཕྱུག་ལ་གསུང་ངག་རིན་པོ་ཆེ་ལས་སྨིན་བྱེད་དགྱེས་པ་རྡོ་རྗེའི་དབང་ཆེན་བསྩལ་བ་ན། མཁན་ཆེན་གྱིས་དེ་མ་ཐག་ཏུ་ལྷན་ཅིག་སྐྱེས་པའི་ཡེ་ཤེས་མངོན་སུམ་དུ་རྟོགས།
གཞན་ཡང་ཐེངས་ཤིག་སྲིད་སྐྱོང་སྟག་བྲག་རིན་པོ་ཆེས་དབུས་ཀྱི་ཟིང་འཁྲུག་ཞི་འཇགས་ཀྱི་ཆེད་གཞུང་ས་དགའ་ལྡན་ཕོ་བྲང་དུ་གདན་དྲངས། དེའི་སྐབས་སུ་རྭ་སྒྲེང་རིན་པོ་ཆེས་སེ་ར་སོགས་ཀྱིས་རྒྱབ་སྐྱོབ་འོག་བསྐྱར་དུ་སྲིད་སྐྱོང་བླངས་པར་དགོངས། རྭ་སྟག་གཉིས་ཀྱི་ཟིང་འཁྲུག་ཞི་བའི་སླད་དུ་སྒྲུབ་ཆེན་ཚོགས། ཡུངས་དཀར་གཏོར་མ་ལ་གཏད་དེ་འཕངས། འཕྲལ་དུ་སྒྲ་ཆེན་པོ་གྲགས། བདུད་རྩི་བབས་པར་བྱུང་། དེའི་མཚན་མོར། ཀུན་ཀྱིས་འབྲུག་གྲགས་པར་ལྟ་བུའི་སྒྲ་དྲག་པོ་ཐོས། དེ་ནི་སྲུང་མ་དངོས་སུ་ཕེབས། སྨན་རག་གི་སྣོད་འབར་དུ་བཅུག ཆག་སྟེ་དུམ་བུར་གྲུམ། མཐར་ཟིང་ཆ་འཇགས་ཏེ་ཀུན་གྱི་མངོན་འདོད་ཞི་བདེ་སླར་ཡང་རྙེད།
ང་ཚོའི་རྗེ་བཙུན་སྐུ་གཞོན་གཅིག་གིས་ང་ལ་འདི་ལྟར་གསུངས་མྱོང་། ཡང་སྐབས་ཤིག་བོད་ལ་བར་ཆད་ཀྱི་མཚན་མ་མངོན་པའི་ཚེ། ཁོང་གིས་གདུང་སྲས་ཤིན་ཏུ་སྐུ་ན་ཕྲ་བ་ཡན་གྱི་ཉེ་འཁོར་ཡོད་དོ་ཅོག་ལ། ངེས་པར་དུ་ཆོས་སྐྱོང་གི་བསྐང་གསོ་འཕྲིན་བཅོལ་ཉིན་ཞག་དུ་མ་སྒྲུབ་དགོས་ཞེས་བཀའ་གསང་ནན་པོར་ཕེབས། དེའི་ཚེ་རྗེ་བཙུན་སྐུ་གཞོན་དེ་སྐུ་ན་ཕྲ་བས་བྱ་བ་གཞན་ལ་གཡེང་ནས་ཕྱི་བཤོལ་བྱས་སྙིང་འདོད། ཉིན་ལྟར་འདི་འདྲ་སྒྲུབ་ཆེན་ཡུན་རིང་ཚོགས་མ་དགོས་ན་དགའ་བ་ལགས་སྙམ། ཕྱི་ཉིན་མགོན་ཁང་དུ་ཡབ་དམ་པ་སྒུག་བཞིན་པར། ཡབ་བྱོན་ཏེ་རྗེ་བཙུན་སྐུ་གཞོན་ལ་ཕྱི་མིག་གཅིག་བལྟས། ཁྱོད་ཉིན་ལྟར་སྒྲུབ་ཆེན་ཚོགས་སྙིང་མ་འདོད་ན་ང་ཡི་བུ་མོ་མིན་ཞེས་གསུངས།
ཚིག་འདི་ཇི་འདྲ་བཙན་ཡང་ཡབ་ལ་གཞན་སེམས་ཤེས་པའི་མངོན་ཤེས་ཐོགས་པར་མེད་པ་ཡོད་པར་ཤེས་ཏེ། དུས་དེ་ནས་བཟུང་། རྗེ་བཙུན་སྐུ་གཞོན་དེས་ཀྱང་ཆོས་ཉམས་ལེན་ལ་ཤིན་ཏུ་བརྩོན་པར་གྱུར།
སྒྲུབ་ཆེན་གྱི་སྐབས་སུ། ཁོང་གིས་རྔ་བརྡུང་པ་ན་རྔ་ཡི་དབྱུ་གུ་ལ་མེ་སྟག་འཁྱུག ཏིང་ཤམ་བརྡུང་བ་ན་ཏིང་ཤམ་ལས་མེ་ལྕེ་འབར། ལྷ་ཁང་ཡོངས་སུ་གང་། སླར་ཏིང་ཤམ་ལ་བསྡུས་པར་ཉེ་འཁོར་ཀུན་གྱིས་མཐོང་། ལུས་སྦྱིན་པའི་ཡབ་ཙམ་མིན་པར། འདི་ཕྱི་ཚེ་རབས་གཏན་གྱི་སྐྱབས་དང་། དཔུང་། མགོན་གྱི་མཆོག དྲིན་ཆེན་རྩ་བའི་བླ་མ་དམ་པ་ཡིན་པའི་ངེས་ཤེས་དང་དད་པ་ཁྱད་པར་ཅན་ངང་གིས་སྐྱེས་ཟེར།
སེ་ར་དགོན་པའི་གཤམ་ལ་གདོན་འདྲེའི་སྒྲ་སྐད་འཇིགས་སུ་རུང་བ་གྲགས་པར་བརྟེན། གདན་ས་ཆེན་པོ་སེ་ར་རུ་སྦྱིན་སྲེག་ལ་གདན་དྲངས་པར་ཕྱག་ཕེབས། སྦྱིན་སྲེག་བྱས་ཏེ་རི་ཀློང་ཐམས་ཅད་སྒྲ་ཆེན་པོ་འུར་ཆིལ་ལེར་གྲགས་པར་བྱུང་། གདོན་བགེགས་མ་རུང་པའི་དཔུང་ཤུགས་ཚར་བཅད།
རྗེ་འདི་ཉིད་གཏེར་སྟོན་ཞིག་ཀྱང་ངེས་པར་ཡིན་ཏེ། དཔལ་མོ་དཔའ་ཐང་དུ་ཕེབས་དུས། རི་རྩེའི་མཆོད་རྟེན་གྱི་གམ་དུ་ཕྱིན། ས་འོག་ནས་ཆུ་བཏོན། དེའི་ཚེ་མི་རྣམས་ཀྱིས་མཆོད་རྟེན་བསྐོར་བ་ན་ངག་ནས་གླུ་འདི་ལྟར་བླངས་ཏེ།
དཔལ་ལྡན་ས་སྐྱ་ཁྲི་ཆེན།།
ཨོ་རྒྱན་པདྨ་དངོས་རེད།།
དཔའ་ཐང་ཆུ་མེད་ཐང་ལ།།
ངོ་མཚར་སྒྲུབ་ཆུ་བཞེས་སོང་།།
སྔར་ལས་ཀྱང་གྲགས་པ་ཆེ་བར་གྱུར། ཡང་ནུབ་དུ་ཕེབས་པའི་ལམ་བར་རི་རྙིལ། ཡ་ང་གང་ཡང་མེད་པར། མཐུ་དང་ནུས་པ་བསམ་ཡུལ་ལས་འདས་པ་མངའ་བས་ཐུར་དུ་ལྷུང་བའི་ཕ་བོང་ཆེན་པོ་ཡང་གྱེན་དུ་བཟློག གདན་ས་ས་སྐྱའི་ལྷ་ཁང་ཆེན་པོ་ཞིག་གསོ་རྒྱ་ཆེར་མཛད། ས་འོག་ནས་རྡོ་ངོ་མཚར་ཆེ་བ་བཏོན་ནས་ཀ་བ་དང་། ཐེམ་སྐས་བྱས། འོད་དཀར་པོ་རང་བཞིན་གྱིས་འཕྲོས་པའི་གཏེར་ཆོས་འབྱུང་གི་དབྱིབས་ཅན་ས་འོག་ནས་བཏོན། མི་རྣམས་ཀྱི་གཏེར་སྟོན་ཡིན་ནམ་སྙམ་པའི་ཐེ་ཚོམ་དང་སོམ་ཉི་མཐའ་དག་ནམ་མཁའ་ལ་འཇའ་ཡལ་བ་ལྟར་གྱུར།
ཡབ་འཛམ་གླིང་ཆེ་རྒུ་དབང་སྡུད་དགོངས་པ་མྱ་ངན་ལས་འདས་ཁར། ཉེ་འཁོར་ཀུན་གྱིས་ངག་དབང་མཐུ་སྟོབས་དབང་ཕྱུག་མ་རྙེད་དེ་སེམས་ཚབས་ཆེ། ཉིན་གསུམ་གྱི་མཐར། གང་ནས་ཕེབས་འོང་བ་ཆ་མ་འཚལ་བར་གློ་བུར་མདུན་དུ་ལྷགས། ཀུན་གྱིས་གར་སོང་དྲིས་པ་ན། ཡབ་དང་ལྷན་དུ་ཡོད་གསུངས། དོན་ལ་ཡབ་དམ་པ་ཤམྦྷ་ལའི་ཞིང་ལ་ཕེབས་བསྐྱལ་ཞུས་པར་མངོན་ཏེ། ཁོང་གིས་ཕྱག་ལ་འཇིག་རྟེན་ན་སྔར་མཐོང་མ་མྱོང་བའི་ཤམྦྷ་ལའི་མེ་ཏོག་ཤིན་ཏུ་ངོ་མཚར་ཅན་ཞིག་བསྣམས། མེ་ཏོག་དེ་ཡེ་མི་རྙིད་པར་མི་ཐམས་ཅད་ཧ་ལས་པར་གྱུར།
ཁོང་གིས་སྔ་ཕྱི་ལྷ་ཁང་ཆེན་པོ་གསུམ་དང་ས་སྐྱ་ལྷོ་རྒྱུད་ཀྱི་བཤད་གྲྭ་གཅིག་ཞིག་གསོ་མཛད། ཕྱོགས་མཐའ་ཀུན་ནས་འོང་བའི་ཐོས་བསམ་དོན་གཉེར་ཅན་མང་པོ་འདུས། གང་དུ་ཕེབས་ཀྱང་སློབ་ཚོགས་ཤིན་ཏུ་རྒྱས། དགོན་སྡེ་མང་པོ་རྒྱ་བསྐྱེད་གནང་། ས་སྐྱ་གོང་མ་རྣམ་ལྔ་མཚོན་པའི་སྐུ་གསུམ་ཐུགས་ཀྱི་རྟེན་དཔག་ཏུ་མེད་པར་བཞེངས།
ཡང་གནས་གཟིགས་མང་པོ་ཕེབས་པར་སྣང་སྟེ། རྒྱ་གར་འཕགས་པའི་ཡུལ་དུ་སྟོན་པ་ཐུགས་རྗེ་ཅན་གྱི་གནས་ཆེན་བརྒྱད་སོགས་ལ་ཞིབ་མཇལ་མཛད། རྒྱ་གར་དུ་བཞུགས་རིང་། མ་ཧ་མ་གན་དྷི་མཆོག་དང་མཇལ་འཕྲད་བྱུང་། ཤིན་ཏུ་གསལ་བ་མ་ཤེས་མོད། མཉམ་དུ་རླངས་འཁོར་གཅིག་ལ་ཕེབས། ཕན་ཚུན་རང་བཞིན་གྱིས་མོས་གུས་དང་དྭངས་བ་སྐྱེས་པའི་ཚུལ་ཡོད།
ཕྱི་ལོ༡༩༥༠ལོའི་རྗེ་བཙུན་གྲགས་པ་རྒྱལ་མཚན་གྱི་འདས་མཆོད་ཉིན། སྔར་སྐུ་འཁྲུངས་པའི་གཟིམ་ཁང་དེ་ག་རང་ལ་བཀྲ་ཤིས་དགེ་བའི་རྟགས་མཚན་དང་བཅས་ཏེ་དགོངས་པ་ཆོས་དབྱིངས་སུ་ཐིམ། ས་སྐྱ་ལ་ཡོད་པའི་འབངས་མི་སེར་དཀྱུས་མ་ནས་མི་ཆེན་སྐུ་དྲག དེ་བཞིན་ནམ་རྒྱུན་བཞིན་ངམ་གནག་གེར་བཞུགས་པ་ཀུན་ཀྱང་ཡིད་ཤིན་ཏུ་གདུང་བས་འོ་དོད་འབོད། སྐྱོ་བའི་མཆི་མ་ཤོར། ས་ཆེན་པོ་ཡང་མྱ་ངན་བྱས་པར་ལྟར་གཡོ་ཞིང་འུབ་པ། མཁའ་འགྲོ་མ་རྣམས་ཀྱི་བསུ་བ་དང་མཆོད་པ་ཕུལ་བའི་རྟགས་སུ་ནམ་མཁའ་ལ་ཉི་འོད་ཀྱི་གདུགས་དང་གུར་ཁྱིམ། འཇའ་སྤྲིན་སྣ་ཚོགས་འཁྲིགས་པ་བསམ་ཡུལ་ལས་བརྒལ་བའི་ལྟས་དང་མཚན་མ་མི་རྣམས་ཀྱི་མངོན་སུམ་ཡུལ་དུ་གྱུར། ཐུགས་དམ་ལས་གྲོལ་ཏེ་རིག་སྟོང་སྐྱེ་འགག་བྲལ་བའི་ཀློང་དུ་གཤེགས། སྐུ་གདུང་རིན་པོ་ཆེ་ཞུགས་སུ་ཕུལ་བའི་རྗེས། རྗེས་འཇུག་དད་ལྡན་གདུལ་བྱ་རྣམས་ཀྱི་ཆེད་དུ། དབུ་ཐོད་དང་དབུ་སྐྲ། ལྗགས་དང་སྤྱན་ཞུགས་ཀྱིས་ཅང་མ་གནོད་པ་དང་། རིང་བསྲེལ་མང་པོ་ཤུལ་དུ་བཞག
ངག་དབང་མཐུ་སྟོབས་དབང་ཕྱུག་གི་བཞག་པའམ་ཕྱག་རྗེས་གཞན་ཞིག་ནི་ཁོང་གི་སློབ་མ་རེད། ཁྱད་པར་དུ་ཁོང་གི་སྲས་དང་སྲས་མོ་ཚོ་རེད། ཀུན་གྱི་བགྲེས་ཤོས་ནི་ང་ཚོའི་སྤོ་བོ་ལགས། སྐྱབས་མགོན་བདེ་བར་གཤེགས་པ་༧འཇིགས་བྲལ་བདག་ཆེན་རྡོ་རྗེ་འཆང་ངག་དབང་ཀུན་དགའ་བསོད་ནམས༼༡༩༢༩--༢༠༡༦༽ཁོང་རེད། ཡབ་ངག་དབང་མཐུ་སྟོབས་དབང་ཕྱུག་གིས་ཉིད་ཀྱི་བླ་མ་ངོར་ཀླུ་ལྡིང་རྒྱལ་སྲས་ཆོས་ཀྱི་ཉི་མའི་ཡང་སྲིད་དུ་ངོས་འཛིན་མཛད།
ངག་དབང་མཐུ་སྟོབས་དབང་ཕྱུག་གིས་ང་ཚོའི་སྤོ་བོ་ལགས་ན་ཡི་དམ་རྡོ་རྗེ་ཕུར་པ་དང་གསུང་ངག་རིན་པོ་ཆེ་ལམ་འབྲས་བུ་དང་བཅས་པའི་གདམས་ངག་གཙོས་པའི་ཆོས་བཀའ་རྒྱ་མཚོ་ལྟ་བུ་ཚངས་སྤྲུགས་སུ་བསྩལ། སྤོ་བོ་བདེ་བར་གཤེགས་པ་གང་གིས་ཐུགས་བརྩེ་བ་ཆེན་པོའི་ངང་ནས་ལྷག་ལུས་མེད་པ་བདག་ཅག་རྣམས་ཀྱི་བགོ་སྐལ་དུ་བསྩལ་བ་དེ་ནི་ང་ཚོ་ཇི་འདྲ་བསོད་ནམས་ཆེ་བ་དང་སྐལ་བ་བཟང་པོ་རེད་དྲན་གྱིན་ཡོད།
གཞན་ཡང་རྟེན་འབྲེལ་ཁྱད་པར་དུ་འཕགས་པ་ཞིག་ལ། སྤོ་བོ་བདེ་བར་གཤེགས་པ་ཁོང་ངག་དབང་མཐུ་སྟོབས་དབང་ཕྱུག་གི་སློབ་མ་བགྲེས་ཤོས་ཡིན་པ་མ་ཟད། འཇམ་མགོན་བླ་མ་འཇམ་དབྱངས་མཁྱེན་བརྩེ་དབང་པོའི་སྤྲུལ་པའི་ཟློས་གར་བསྒྱུར་བ་འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས༼༡༨༩༣--༡༩༥༩༽་དང་དིལ་མགོ་མཁྱེན་བརྩེ་རབ་གསལ་ཟླ་བ༼༡༩༢༠--༡༩༩༡༽་རྣམ་གཉིས་ཀྱི་ཞལ་སློབ་ཀྱི་གཙོ་བོ་ཡང་གྱུར།
ངག་དབང་མཐུ་སྟོབས་དབང་ཕྱུག་གི་གདུང་སྲས་སྐུ་གཞོན་ནི་ང་ཚོ་སྤོ་བོ་རབ་བྱུང་རྟེན་ཅན་ངག་དབང་ཀུན་དགའ་འཕྲིན་ལས་བཀྲ་ཤིས་༼༡༩༣༤–༡༩༩༧༽རེད། སྲས་མོ་ནི་ང་ཚོའི་རྨོ་རྨོ་རྗེ་བཙུན་སྐུ་གཞོན་རྣམ་པ་སྟེ། རྗེ་བཙུན་ཐུབ་བསྟན་དབང་མོ༼༡༩༢༤---?༽། རྗེ་བཙུན་སྐལ་བཟང་ཆོས་སྒྲོན༼༡༩༢༦--༢༠༠༧༽། རྗེ་བཙུན་ཚེ་སྦྱིན་དབང་མོ༼༡༩༣༦--༽། རྗེ་བཙུན་འཆི་མེད་དབང་མོ༼༡༩༣༩---༽་དང་རྗེ་བཙུན་དཀོན་མཆོག་དབྱངས་ཅན༼༡༩༤༤---༽་བཅས་ཡིན་པ་དང་། ཕྱི་མ་གསུམ་ད་དུང་ཞལ་བཞུགས་བཞིན་པ་དང་། ཁོང་རྣམ་པའི་མ་ཡུམ་སྟེ་ངག་དབང་མཐུ་སྟོབས་དབང་ཕྱུག་གི་བདག་མོ་ནི་མུ་ཤངས་བྱ་རིགས་པའི་བདེ་ཆེན་སྒྲོལ་མ༼༡༩༠༡--༡༩༥༤༽་རེད།
ངག་དབང་མཐུ་སྟོབས་དབང་ཕྱུག་ཁོང་རྗེས་སུ་དྲན་ཐེངས་རེ་ལ་བསྐུལ་མ་ཤིན་ཏུ་ཆེན་པོ་ཐོབ། ང་ཚོས་ངེས་པར་དུ་ཁོང་གི་རྗེས་སུ་འབྲང་སྟེ། ཐོས་བསམ་སྒོམ་གསུམ་ལ་འབད་བརྩོན་གཡེང་བར་མེད་པ་བགྱིས་ཏེ། ཡབ་མེས་རྣམས་ཀྱི་ངོ་མི་གནོང་པ་ཞིག་བྱ་དགོས་ཡང་ཡང་དྲན། ཁོང་གི་རྣམ་ཐར་དང་མཛད་རྗེས་ལ་ཕྱི་དྲན་བྱས་དུས། དམ་པའི་ཆོས་ཇི་ཙམ་ཚུལ་བཞིན་དུ་ཉམས་སུ་ལེན་ན་གྲུབ་འབྲས་ཀྱང་དེ་ཙམ་ཐོབ་ནུས་པར་སྐུལ་མ་ཐེབས། ང་ཚོ་མི་རེ་རེ། སེམས་ཅན་རེ་རེ་ནས་བདེ་བར་གཤེགས་པའི་སྙིང་པོ་རང་ཆས་སུ་རྒྱུད་ལ་ཡོད་པས་ན། དམ་པའི་ཆོས་གཤའ་མ་ཞིག་སྒྲུབ་ཐུབ་ན་བླ་ན་མེད་པའི་བྱང་ཆུབ་སྒྲུབ་ཐུབ་ལ། མཐའ་ཡས་པའི་སེམས་ཅན་ལ་ཡང་ཕན་བདེ་སྒྲུབ་ཐུབ།
ངག་དབང་མཐུ་སྟོབས་དབང་ཕྱུག་གི་རྒྱ་ཆེ་བའི་མཛད་རྣམ་སྣ་ཚོགས་རྫུ་འཕྲུལ་མངོན་ཤེས་སྟོན་པ་དང་བཅས་པ་ཐམས་ཅད་རྩ་བ་སྙིང་རྗེ་ཆེན་པོས་གཞན་དོན་ལ་དམིགས་ཤིང་ཤེས་རབ་ཀྱིས་རྫོགས་བྱང་ལ་དམིགས་པའི་བྱང་ཆུབ་ཀྱི་སེམས་འདི་ཁོ་ན་ཡི་རྩལ་ལས་བྱུང་། དེས་ན་ང་ཚོའི་མི་ཚེ་ཧྲིལ་པོའི་ནང་དུ། ཉམས་ལེན་ཀུན་ཀྱི་རྩ་བ་ནི་བྱང་ཆུབ་ཀྱི་སེམས་རིན་པོ་ཆེ་འདི་ཉིད་ལ་ཐུག་ཡོད། དེ་ལ་བརྟེན་ནས་ཚུལ་བཞིན་མ་ནོར་བ་ལག་ལེན་དུ་བསྟར་ནུས་ན་བདག་ཅག་གི་སྟོན་པ་ཐུགས་རྗེ་ཅན་གྱི་ལུང་དང་རྟོགས་པའི་བསྟན་པ་སྤྱི་དང་བྱེ་བྲག་ཡབ་མེས་ཀྱི་བརྒྱུད་པ་གསེར་གྱི་ཞུན་མ་ལྟ་བུ་ཉམས་པ་སོར་ཆུད་མ་ཉམས་གོང་ནས་གོང་དུ་སྤེལ་བ་ལ་སྲི་ཞུ་མི་དམན་པ་སྒྲུབ་ཐུབ་ངེས་ལགས་སོ།
